TVB老戲骨爆曾被要求臺慶跳Hip Hop！體力難負荷成離巢伏線

馮素波爆曾被要求臺慶跳Hip Hop：有年長同事跳到入院 | 香港01

馮素波（波姐）早前在社交平臺宣佈與TVB結束前後30多年的合作關係，近年開設IG後，波姐被髮掘出貼地、玩得的一面，不論電影甚至“隔籬臺”ViuTV的劇集《繩角》都見到其蹤影。

她離巢後曾指TVB的現有制度不太適合年長藝人，而接受《01娛樂》專訪時，她剖白自己不續約的數個原因，其中一個確實與《繩角》有關。

當時她向藝員部申請出外接拍這套外判劇，過程中有點不愉快，波姐說：“或者咁樣觸怒咗佢少少，觸怒咗一個話事人，唔係觸怒公司，所以佢就要用到邵氏嘅權力撻落我嗰度。”不過她就強調，自己並非與 TVB 分手，只是與藝員部話事人分手。

接拍ViuTV外判劇《繩角》　疑觸怒話事人致工作減少

其實波姐數年前已轉成“每年一Show”合約，方便還騷後可以出去唱歌、表演、拍其他節目、去旅行，無可否認自由身的話可省卻向公司申請許可的程序。問到申請批覈是否很難、限制多不多，她說：“不嬲佢都冇話限制你唔做得呢度唔做得嗰度，不過你需要呢份工嘅時候，你要絕對尊重佢。佢話你需要做第二度嘅，你咪返嚟公司申請，但係公司多數都唔批，因爲佢都要保障佢哋嘅收視嘛。”

一般申請拍電影的成功獲批機率都高，但要拍第二個電視臺的節目，又可不可以呢？波姐說合約上冇寫明不能接，但接洽過程中，藝員部或會提出要求、條件，例如要問清楚幾時播出，最好不要兩個臺同步出街，波姐也理解公司考量。

被邀接綜藝跳Hip Hop感不解：想一班老人家俾人笑？

波姐幾歲入行，能唱能演，也一直對監製起用自己心存感激，但對於公司曾要求她去拍綜藝、跳Hip Hop，她始終不解，“佢叫我參加佢嗰啲綜合性節目，我話點解呢？我個人唔係綜合性，我係一個演員，你唔畀劇我做，叫我參加嗰啲？佢話我畀個平臺你表演你嘅才華，我又覺得幾得意，我話唔係因爲我有才華你先簽我返嚟嘅咩？如果執着於呢一句說話嘅，我係咪應該要離開呢？”

她最終沒有接下綜藝節目，因爲覺得自己不擅長玩遊戲，對方也未有清楚解釋節目形式，因此她無謂勉強，只以一個玩笑結束那場對話，“佢問我，你嘅才華最叻係做乜嘢呀？我都無言以對。因爲我開演唱會，所以我話我最叻賣飛，我話你有演唱會搵我去唱啦，我去幫你賣嚇飛。”

而另一次，TVB叫波姐去臺慶表演，項目是跳舞，她說年輕時都有跳過踢躂舞，不過公司這次竟叫她和一班年長同事一齊跳Hip Hop，“我梗係唔返啦！我唔需要搏埋條老命呀嘛？我見有一兩個同事，話‘攞命呀！跳完入咗醫院！’點解？因爲骨架嗰啲，最辛苦嗰個就係我死咗個妹夫，余子明嗰年都有跳，佢話‘黐線㗎，我幫佢跳，跳到上氣唔接下氣！’咁我覺得我個抉擇係啱，因爲嗰個唔係我範疇。你擺出嚟係想我哋出醜定係想我哋美化呢？你要一班老人家出去跳Hip Hop，係俾人笑，咁我覺得好影響我日後嘅發展。”

高層變動、合約條款改變　體力難負荷成離巢伏線

波姐不諱言，前年無綫藝員管理部原本的話事人退休，新高層接任，合約條款都隨之大幅改動，當時她已經想和平分手，對方卻遊說她續約：“佢話，波姐或者你同我籤多年啦，好似我一上場就趕到你哋走曬咁，我話有啲條款真係唔適合我哋年紀大嘅人做㗎喇。”

拍《隱形戰隊》時，唐詩詠、陳山聰、林子善更是自發調通告時間，寧願自己辛苦點遲收工，都想波姐等年長藝人快手拍完回家休息。

不過波姐的心態是：“成日要人就，就得幾多？”有時接了套劇，明知趕住煞科埋尾，要連踩七日，波姐不想帶給大家麻煩或耽誤進度，“做到我哋咁嘅年紀，會唔會去認衰話自己頂唔順走先，雖然監製有叫過你咁，不過成日要搵替身，搵借位，搵人遮咗你個位置，都係帶畀同事一個麻煩，咁我就死頂都做。”

與藝員部話事人分手　對方沒挽留反而走得舒服

早在3、4年前，波姐接受《01娛樂》專訪，已透露過想外闖的想法，認爲綠葉若永遠躲在TVB，是悲哀、會跟社會脫節的，而她近幾年確實積極做不同範疇的工作，唱歌登臺、拍電影、拍MV、開YouTube等，外間迴響也是始料不及。